Forcat operacionale po vijojnë ende kërkimet, për të nxjerrë trupat nga rrënojat në Durrës dhe Thumanë.
Në ndihmë të Shqipërisë kanë ardhur trupa dhe mjete nga Kosova, Greqia, Italia, Rumania dhe Turqia.
Deri më tani flitet për 32 viktima dhe 47 të shpëtuar.
Njëri prej të shpëtuarve, një fëmijë i vogël nga Thumana, ka treguar momentet e tmerrit.
Ai shprehet se i kishte rënë rafti te këmba dhe më pas ishte zgjuar poshtë gurëve, raporton “Top Channel”
“Më ra rafti ke këmba. Isha me babin, mamin dhe motrën. Pastaj nuk mbaj mend gjë më. Kur u zgjova, isha poshtë gurëve. Më ishte ngatërruar batanija dhe nuk dilja dot. Bërtita sa bërtita dhe erdhën më nxorën ca burra”, tregon djali i vogël.
Fati i familjes së tij nuk dihet ende, ndërsa forcat e ndërhyrjes së shpejtë po bëjnë gjithçka për të nxjerrë njerëz të gjallë nga rrënojat.
