Detaje të reja janë zbardhur nga plagosja me armë zjarri në Shkodër ditën e sotme. Ish-kreu i PS në Vaun e Dejës, Nikolin Hubaj është dërguar për mjekin në Spitalin e Traumës në Tiranë, ndërsa ka thënë se është qëlluar sapo ka dalë nga kafja.
Balkan Ëeb bën me dije se Hubaj është marrë në pyetje sapo ka dalë nga salla e operacionit dhe ka thëne se në drejtim të tij kanë qëlluar dy persona me motor, me skafandër në kokë. 54-vjeçari ka treguar se nuk ka konflikt me asnjë dhe nuk e di kush mund të jenë autorët.
“Sapo kam dalë nga kafja dy persona me motor me skafandër në kokë janë afruar dhe më kanë qëlluar. Nuk më kanë thënë asnjë fjalë. Une nuk e di se kush janë, sepse nuk kam asnjë konflikt me askënd. Vetëm qëlluan dhe ikën, nuk kam asnjë ide përse më qëlluan”, ka thënë Hubaj.
Ndërkohë, policia ka disa pista dhe kryesorja është se Huba mund të ketë dhënë informacion për efektivët e policisë, në lidhje me kontrollet që janë zhvilluar në zonë për kanabis, dhe për këtë arsye e kanë plagosur. Kjo është pista fillestare, por nuk është ende e bazuar në prova, ndërsa po hetohen edhe pista të tjera.
