Ilirjan Selmani, 31 vjeç, i arrestuar për vrasjen e 52-vjeçares Kozeta Teço në Pogradec, ka dhënë dëshminë e tij të parë në polici, duke pranuar lidhjen me viktimën dhe autorësinë e krimit.
Në dëshminë e tij, Selmani ka treguar se kishte një lidhje dashurie prej tre vitesh me Teçon, pavarësisht diferencës së madhe në moshë. Ai deklaroi se ndjenja që kishte për të ishte e vërtetë dhe se nuk e shqetësonte mosha. “E doja, nuk më bënte përshtypje mosha. Ajo më përdorte, nuk më donte”, u shpreh ai në rrëfimin para oficerëve.
Sipas deklaratës së tij, çifti bashkëjetonte mes dashurisë dhe varësisë ndaj alkoolit. “Dashuria dhe pija na bashkonte. Ajo dehej shpesh. Njësoj bëja dhe unë. Kohët e fundit kishte raste kur më godiste. E duroja sepse e doja. Por pastaj nuk durova dot më”, tregoi ai.
Selmani shtoi se ishte i vetëdijshëm për situatën dhe për faktin që Teço ishte më e madhe në moshë, por theksoi se nuk i bëri kurrë përshtypje. Ai deklaroi se vinte nga një familje e rregullt dhe nuk e kishte menduar se do të përfundonte si vrasës. Megjithatë, pretendoi se dhuna nga ana e viktimës ishte e përsëritur, për shkak edhe të problemeve të saj të shëndetit mendor, ndaj dhe vendosi ta vriste.
“E dija që ishte më e madhe, por unë e doja. Ajo më përdorte, nuk më donte”, tha Selmani para oficerëve të policisë.
Hetimet për ngjarjen tragjike në Pogradec vijojnë, ndërsa autoritetet janë duke punuar për të zbardhur plotësisht motivet dhe rrethanat e vrasjes.
