Një koment i koreografit Albi Nako, bërë ditën e djeshme në programin “Just Dance”, ku ai është anëtar i jurisë solli reagim të menjëhershëm të opinionit publik. Në rrjetet sociale u kritikua jo vetëm Nako, por edhe moderatorja Dojna Mema, që sipas ndjekësve shfaqi indiferencë dhe nuk reagoi.
E gjitha nisi me konkurrimin e një 40-vjeçareje, perfomanca e së cilës duket se nuk i pëlqeu koreografit.
“Komplimente, por unë mendoj se të garosh me këta të rinj , pa përjashtuar gjithë energjinë tënde, mendoj që je në një moshë… më mirë martohu dhe bëj fëmijë se sa të vazhdosh”, u shpreh Nako.
Kundërshtime të shumta gëluan në internet, duke e konsideruar deklaratën e mësipërme një fyerje të rëndë. Përmes një postimi në Instagram Story ka reaguar vetë Mema:
“Quhem Dojna Mema dhe jetoj në një vend ku s’është e thjesht të jesh NJERI. Punoj në televizion dhe kjo ka qenë gjithmonë ëndrra ime. Jam penduar pak, sepse është e vështirë të kesh një pozicion publik në një vend « jo-normal ». Një ditë të shajnë me « libër shpie » pse jep opinionin tënd (sepse s’je ti për të dhënë mend) dhe ditën tjetër të shajnë prapë pse nuk e dhe. Kam mbajtur gjithmonë qëndrime të forta mbi seksizmin, në vendin e kohën e duhur! Ama kjo nuk mjafton, sepse nëse zgjedh të qëndrosh neutrale një herë, ke qenë fallco gjithmonë. Prezantoj një talent-shoë kërcimi me një juri dhe pozicioni im është shumë delikat, por gjithmonë asnjanës. Jam sulmuar sërish, me po të njëjtën dhunë verbale, por kam arritur në një pikë që për fat të keq vinka me moshën, kur ti kupton se je bijë e një populli që e stimulon vetëm ndjenja e shëmtuar e urrejtes. Quhem Dojna Mema dhe jashtë një spektakli ku kam një pozicion asnjanës, mendoj se çdo formë seksizmi duhet të marrë përgjigjen që meriton!”
Përpos masës së gjerë, ndër të tjerë reagoi edhe huktori i humorit, Aleks Seitaj:
“Duke shprehur gjithmonë mendimin tim personal. Marr shkas nga x program televiziv. Mosha nuk ka të bëjë fare me mundësinë për të ëndërruar, kërcyer, kënduar apo perfromuar. Fakti që je grua nuk do të thotë që duhet të mbyllesh në shtëpi, të gjesh burrë dhe të lash tapetet. Dhe nuk ka asnjë aktor, këngëtarë, balerinë, superstar apo lesh me qime, që të të tregojë se si ti duhet ta jetosh jetën, se si duhet të ëndërrosh. Mundësisht edhe 100 vjeç, ndiq ëndrrën tënde”.
