Pandeli Nakoleci, 40-vjeçari shqiptar i dyshuar për vrasjen brutale të bashkëshortes së tij, Marjola Nakoleci, është paraqitur paraditen e së dielës, më 24 gusht, në gjykatën e qytetit Volos, ku u mor në pyetje nga prokurori.
Ngjarja tronditi thellë opinionin publik, pasi krimi dyshohet të ketë ndodhur para syve të katër fëmijëve të çiftit. Gjatë daljes në gjykatë, Nakoleci mbante kokën ulur dhe refuzoi të japë ndonjë deklaratë për mediat.
Pas ngjarjes së rëndë, ai ishte fshehur për më shumë se një ditë në një parcelë me bar, vetëm 200 metra larg banesës. Burime nga hetimi bëjnë të ditur se kishte ndërruar rrobat dhe nuk mbante me vete telefonin apo mjetin e krimit. Arrestimi u bë i mundur pas një sinjalizimi nga një fqinj që kishte vënë re lëvizje të dyshimta.
Autoritetet konfirmojnë se hetimet paraprake nuk kanë evidentuar raste të mëparshme dhune në familje, megjithatë, i dyshuari rezulton të ketë pasur më parë kontakte me policinë.
Trupi i viktimës, 36-vjeçares Marjola Nakoleci, është dërguar në Institutin e Mjekësisë Ligjore në Selanik, ku pritet të kryhet autopsia më 25 gusht. Hetimet për zbardhjen e plotë të krimit vijojnë nën drejtimin e autoriteteve gjyqësore greke.
