Komisioni i Ekonomisë ka shkarkuar nga detyra e anëtarit të Këshillit Mbikëqyrës të Bankës së Shqipërisë, Arben Malajn.
Pak momente para shkarkimit, Malaj bëri me dije se familja e tij është kërcënuar.
Sipas tij, urdhri për shkarkimin ka ardhur direkt nga kryeministri Edi Rama.
“Nuk e kam merak do jem apo s’do jem anëtar i Këshillit Mbikqyrës. Në respekt të familjes time, sakrificat për mandatet e vështira deri në kërcënime familjare, sepse për të ikur familja ime në Amerikë procedurat i ka zbatuar Ahmetaj me ata që kërkuan të ikte urgjentisht se kërcënohej njësoj si familja e një profesori tjetër. Gjërat nuk janë kaq të lehta sa i shikoni. Ngrihet natën Edi Rama dhe i çon sms Erion Braçes shkarkoni Arben Malaj, jo jo, s’janë të lehta.”, u shpreh ai ndër të tjera.
Më tej Malaj theksoi se gjatë 28 viteve i ka shërbyer publikut me integritet maksimal dhe për këtë ndihet krenar.
Profesori i ka quajtur akuzat ndaj tij politike, dhe ka kërkuar që të mos paralizohet bordi i Bankës së Shqipërisë.
“Neodiktaurat janë një rrezik i madh dhe ato po shfaqen në vendet ish-komunist. Në provojat e mia politike kam besuar dhe kam aplikuar faktin se transparenca është aleati më i madh i demokracisë, ndërsa ndarja e pushtetit është kolona strukturore.Gjatë 28 viteve gjatë ballafaqimit publik, i kam shërbyer publikut me integritet maksimal dhe akuzat tuaja janë të thjeshta për t’u hedhur poshtë. Kontributi im më bën krenar. Na atë copë letër thoni se i gjithë bordi nuk është aktiv sa i takon rritjes së kredibilitetit të Bankës së Shqipërisë. Unë nuk dua që të paralizohet bordi. I injoroj akuzat politike”, tha mes tjerash Malaj.
Malaj ka deklaruar se do ta çojë çështjen deri në Gjykatën e Strasburgut.
