Kryeministri Rama ka deklaruar në emisionin Pressing se ai është ndjerë i lënduar nga gënjeshtrat e Albin Kurtit.
Teksa foli për raportet me dy kryeministrat e fundit të Kosovës, Rama tha se Kurti ka gënjyer në reagimin e tij për çështjen e teatrit.
Rama tha se ka heshtur gjatë “luftës politike” në Kosovë në kohë të pandemisë ndërsa aktivistët e Vetëvendosjes kanë punuar që të rrëzojnë qeverinë e tij në Shqipëri.
I pyetur pse nuk reagoi për rrëzimin e qeverisë Kurti, Rama tha:
“Aktivistët e VV s’besoj se u ka ngelur hatri që s’kam thënë asgjë, në kushtet kur në Kosovë partitë janë në betejë të brendshme. Nuk kam marrë anë për të ndërhyrë në punët e brendshme, aktivistët në fjalë kanë ndërmarrë aksione për të rrëzuar qeverinë time kështu që s’besoj se të jetë kjo ajo që kanë pritur aktivistët nga unë. Mendoj që marrëdhëniet e vërteta janë me të vërtetë, e ajo që mua më ka lënduar shumë me Ramushin është gënjeshtra, ajo që më ka lënduar me Albin Kurtin është gënjeshtra. Gënjeshtra publike kur flasim për çështjen e teatrit, çdo me thënë kjo që do i jepet oligarkëve, që 1 mijë policë duhet të mbronin teatrin e jo të bënin detyrën? Nga kush ta mbrojnë? Nga kush vjedhje e kriminalizim? Se Albin Kurti ka shkuar edhe më larg, duke më krahasuar me Sllobodan Milloshevicin, që çfarë i bëri mounumenteve te Kosovës e që çfarë po i bëkam unë asaj ngrehine qe ska qenë kurrë në listën e monumenteve të Kulturës. Njëherë është Isa Mustafa kriminel pastaj profesor. Njëherë thotë eja ti bëjmë varrin kriminelit, pastaj bëhen bashkë. Mua kësisoj akuza nuk më kanë hije. Nuk dua të ndërtoj këso kauza”, shton ai.
Kujtojmë se Rama ka një marrëdhënie të tensionuar me Kurtin, që arriti kulmin pas Samitit të 3 të ‘Mini-Shengenit’ ballkanik, ku Kurti refuzoi të merrte pjesë.
