Gjykata e Korçës ka vendosur masën e sigurisë “Arrest me burg” për 45-vjeçarin Aleks Ago, i arrestuar dy ditë më parë për ngacmim seksual ndaj një 15 vjeçari nga fshati Poloskë i Devollit.
Rasti u denoncua nga nëna e 15 vjeçarit, e cila mori informacion nga djali i saj për ngacmimin seksual.
Ago mohoi akuzat në seancën gjyqësore, duke theksuar se nuk kishte pasur qëllim të ngacmonte seksualisht djalin.
Njoftimi:
“Në Gjykatën e Shkallës së Parë e Juridiksionit të Përgjitshëm Korçë, u zhvillua sot në datën 29.01.2025 ora 10.30 seanca me objekt: “Vleftësim arrestimi në flagrancë, caktim mase sigurimi”, ndaj shtetasit A.A i dyshuar për kryerjen e veprës penale “Ngacmimi seksual”, parashikuar nga neni 108/a/2 i Kodit Penal, ku gjykata në përfundim vendosi: Vleftësimin si të ligjshëm të arrestimit në flagrancë dhe caktimin e masës së sigurimit “Arrest në burg” për këtë shtetas”, njofton gjykata.
Në një intervistë për Euroneës Albania, 15-vjeçari deklaroi dhe dinamikën e ngjarjes, se si 45-vjeçari e ftoi në një zonë të veçuar dhe tentoi të abuzonte seksualisht duke i hequr pantallonat.
“E njoh që para 3 ditësh. Më thoshte hajde me mua se do të jap lekë dhe iu përgjigja se s’kam nevojë për lekë sepse më jep mami. Pastaj më çoi në një vend dhe filloi të më prekte, tentoi të më hiqte tutat por un se lashë. E shpova me një mjet që kisha dhe ika me vrap. Pastaj mamit ia tregova kur ika nga ai vend, teksa ikja për shpi, ishte diku ora tetë”, tha ai.