Nëse SHBA-ja tërhiqet nga Europa, vendet evropiane do të përballen me sfida të mëdha në fushën e mbrojtjes, duke përfshirë nevojën për 300.000 ushtarë shtesë dhe një rritje vjetore të shpenzimeve në 250 miliardë euro.
Sipas një analize të realizuar nga instituti kërkimor i Brukselit Bruegel dhe Instituti i Kielit për Ekonominë Botërore (IFW), përballja me një konflikt të mundshëm me Rusinë pa mbështetjen amerikane do të kërkonte 50 brigada të reja, 1.400 tanke dhe mbi 2.000 automjete luftarake.
Këto shifra tejkalojnë kapacitetet aktuale të ushtrive më të mëdha europiane, përfshirë Gjermaninë, Francën, Italinë dhe Britaninë.
Ekspertët sugjerojnë se vendet evropiane duhet të rrisin ndjeshëm buxhetin e mbrojtjes nga 2% e PBB-së në 3.5%-4%, për të garantuar mbrojtjen e kontinentit.
Vetëm për Gjermaninë, një rritje e tillë do të nënkuptonte një shtesë prej 60 miliardë eurosh në vit në shpenzimet ushtarake.
Megjithatë, këto investime do të kishin edhe ndikim pozitiv në ekonominë e vendeve përkatëse. Studime të firmës këshillimore EY dhe Deka Bank tregojnë se përmirësimi i sektorit të mbrojtjes do të nxiste industrinë metalurgjike, sektorin e logjistikës dhe kërkimin shkencor, duke krijuar një efekt të madh në tregun e punës./DW
