Disa ditë më parë një 49-vjeçar shqiptar në Australi goditi me thikë për vdekje vajzën e tij. Ai e vrau vajzën në makinën e saj pasi ajo e kishte kaluar mbrëmjen me shokët e shoqet e saj në një festë.
Petrit Lekaj, 49 vjeç akuzohet se ka vrarë vajzën e tij, Sabrina Lekaj 20 vjeçe. Ajo ishte studente në universitetin e Australisë Jugore, ku mësohet se ishte një studente me rezultate të larta.
Ditën e djeshme mes lotësh, miqtë, vëllai dhe nëna e 20-vjeçares i dhanë lamtumirën e fundit Sabrinës.
“Daily Mail Australia” ka publikuar pamjet e dhimbshme, ku duket arkivoli ngjyrë rozë i 20-vjeçares. Disa foto të Sabrinës, e cila duket e buzëqeshur janë vendosur sipër arkivolit të saj.
Vëllai i Sabrinës ka lëshuar në qiell 20 tullumbace ngjyrë të bardhë.
“Daily Mail Australia” shkruan se për vrasjen e së resë akuzohet babai i saj, Petrit Lekaj, 49 vjeç me origjinë nga Shkodra, por tashmë prej shumë vitesh emigrant në Australi.
Babai i Sabrinës ndodhet ende në spital, ku ruhet nga forcat e policisë. Nuk dihet ende nëse ai ka kërkuar të marrë pjesë në ceremoninë mortore. Nga fotot e publikuara,ai nuk shihet në lamtumirën e fundit që i është dhënë vajzës së tij.
