Autoriteti Kombëtar i Ushqimit urdhëroi Bashkinë e Vlorës që të mbyllë tregun e Orizit.
Një nga arsyet kryesore mësohet se është bërë mosrespektimi i distancës.
Kreu i AKU Vlorë, Syrja Binaj, tha se tregu do të qëndrojë i mbyllur deri në përmirësimin e masave, pastaj mund të hapet sërish.
Ai shtoi, se qytetarët dhe tregtarët janë këshilluar për respektimin e masave dhe kur nuk u arrit shmangia e problemeve, u vendos mbyllja e tregut.
“Është një nga tregjet që ka pasur problematikë më të madhe në qytet për zbatimin e masave ndaj COVID-19. Duke qenë se ky treg ka patur qarkullim makinash, hapësira të kufizuara dhe dyndje të qytetarëve kemi hasur problematikë ku kemi këshilluar tregtarët dhe qytetarët për të respektuar masat. Por duke qenë se nuk arritëm t’i shmangnim këto probleme, vendosëm që ky treg të mbyllet dhe të merren masat për rregullimin e tyre. Kur bashkia të bëjë tregun gati ai do të hapet. Mes tyre ndalimin e qarkullimit të automjeteve brenda tregut. Pikëzimin për ruajtjen e distancave”, tha ai.
Tregtarët ndërkohë janë ngritur në protestë që në orën 5 të mëngjesit.
Ata shprehen se nuk janë lajmëruar dhe malli do t’u prishet.
