Komisioni Hetimor ka përfunduar mbledhjen e sotme për presidentin Ilir Meta dhe në fund të mbledhjes së sotme u votua që të mos shkarkohet.Komisioni vendosi të mos e shkarkojë Metën me argumentin se nuk ka bërë një shkelje të një shkalle të tillë.
Në përfundim të mbledhjes është miratuar raporti final mbi veprimet e presidentit me 6 vota pro asnjë kundër.
Kreu i Komisionit Ulsi Manja lexoi një pjesë të raportit, duke përfshirë dhe sugjerimet për Kuvendin, siç është një ligj organik për Presidentin.
“Shkeljet e kryera nga Presidenti i Republikës në formën e veprimeve ose mosveprimeve nuk konsiderohen të mjaftueshme për propozimin seancës plenare për shkarkimin e Presidentit. Komisioni hetimor i sugjeron dhe i rekomandon Kuvendit të Shqipërisë këto zgjidhje” rishikim të dispozitave kushtetuese për të qartësuar pozitat e presidenti, një ligj organik për presidentin. Në kuadër të ligjeve të reja të reformës në drejtësi ka qenë dhe një ligj organik për Presidentin i Republikës po u tërhoq nga procedura sepse nuk qartësonte kompetencat e Presidentit por merrej me privilegjet presidenciale”.
Ndërkohë pritet që raporti të miratohet në një seancë të posaçme parlamentare në Kuvend.
Kujtojmë se Kuvendi me 101 vota pro dhe 6 kundër votoi rreth 1 vit më parë ngritjen e komisionit hetimor parlamentar për shkarkimin e tij pas zhdekretimit të zgjedhjeve të 30 qershorit, të cilat fillimisht i anuloi dhe më tej shpalli një datë të dytë, 13 tetorin.
Edhe në raportin final të Venecias thuhej që presidenti Ilir Meta tejkaloi kompetencat e tij duke anuluar zgjedhjet e 30 qershorit, megjithatë theksohej se nuk është e mjaftueshme për shkarkimin e tij.
