Etapa e tretë e “Giro d’Italia” ka përfunduar sot në Shqipëri, duke mbyllur një itinerar spektakolar prej 160 kilometrash që nisi dhe përfundoi në Vlorë, duke kaluar përmes Kuçit, Qeparos, Himarës dhe Llogarasë.
Fituesi i kësaj etape u shpall danezi Mads Pedersen, i cili tashmë ka siguruar dy fitore në tri etapat e para dhe është konfirmuar si lideri i klasifikimit të përgjithshëm.
Kjo ishte një ngjarje historike për vendin tonë, për herë të parë që nga themelimi i saj në vitin 1909, “Giro d’Italia” nisi jashtë kufijve perëndimorë të Europës dhe zgjodhi Shqipërinë si pikënisjen zyrtare, “Grande Partenza” të edicionit të 108-të.
Në tre ditët e saj në Shqipëri, gara përshkroi Durrësin, Tiranën dhe Vlorën, duke shpalosur një mozaik të bukur të natyrës shqiptare përballë syve të botës.
Etapat shqiptare, një përzierje emocionesh dhe sprovash
• Etapa 1: Durrës – Tiranë 160 km, me ngjitje të forta në Surrel dhe rrugë të mbushura me sfida teknike.
• Etapa 2: Një kronometër 13.7 km në Tiranë, mes shesheve dhe bulevardeve më të njohura të kryeqytetit.
• Etapa 3: Vlorë – Llogara – Vlorë (160 km), me një peizazh të mrekullueshëm dhe një ngjitje që testoi kufijtë fizikë të çiklistëve.
Organizatorët ndërkombëtarë vlerësuan lart mikpritjen dhe panoramat e Shqipërisë, duke e konsideruar vendin tonë si një “zbulim emocionues” për çiklizmin.
Por entuziazmi nuk i mbylli sytë përballë sfidave reale që u hasën në terren.
Megjithëse qeveria shqiptare shpenzoi mbi 7 milionë euro për të sjellë “Giro d’Italia” dy ditë para zgjedhjeve, rrugët në shumë segmente mbetën të papërfunduara deri në natën para garës.
Raportime nga mediat ndërkombëtare, si Cycling News dhe Feltet.dk, theksuan problematika serioze si:
• trafik i çrregullt dhe i papërballueshëm për testime,
• punime të vazhdueshme deri në momentin e fundit,
• gropa të rrezikshme dhe mungesë sigurie për atletët.
Drejtues të skuadrave si Alpecin-Deceuninck dhe Visma-Lease a Bike ngritën alarmin për pasigurinë në itinerar.
“Ishte jashtëzakonisht e rrezikshme”, deklaroi Gianni Meersman. Ndërkohë, çiklisti belg Wout van Aert përshkroi rrugët e Tiranës si “të paparashikueshme”. Rrjeti danez raportoi që punëtorët e asfaltit vijonin punën edhe kur çiklistët po bënin xhiron e fundit të inspektimit.
Ndërsa çiklistët kaluan vijën e finishit dhe publiku shqiptar përjetoi emocione unike, shumë qytetarë pyetën nëse vendi ishte realisht i përgatitur për një ngjarje të kësaj përmase.
Kaosi në trafik, bllokimi i akseve për ditë të tëra dhe vështirësitë organizative ekspozuan mangësi të thella në infrastrukturë dhe menaxhim.
Një moment historik, por me mësime për të ardhmen
“Giro d’Italia 2025” do të mbetet në memorien kolektive si një sukses historik për sportin shqiptar dhe një promovim unik për turizmin.
Por në të njëjtën kohë, ajo zbuloi sfidat serioze që Shqipëria duhet të adresojë për të qenë pjesë serioze e kalendarit global sportiv nga asfaltet e rrugëve, deri te standardet e organizimit dhe transparenca e fondeve publike.
Në fund, çiklistët arritën në finish. Por rruga e Shqipërisë drejt nivelit të lartë sportiv dhe organizativ sapo ka nisur. Dhe ajo kërkon më shumë se thjesht asfalt të shtruar në minutën e fundit.
