SPAK përfundon hetimet dhe kërkon gjykimin e 11 të pandehurve për fondet e SASPAC
Ndër personat që do të përballen me gjyqin është Ilir Beqaj, ish-ministër dhe ish-deputet, i cili akuzohet për një sërë veprash penale, përfshirë:
• Korrupsion pasiv i funksionarëve të lartë shtetërorë (kryer në bashkëpunim, dy herë)
• Shkelje e barazisë në tendera dhe ankande publike (kryer në bashkëpunim, tetë herë)
• Falsifikim dokumentesh nga persona me detyrë publike (kryer në bashkëpunim, nëntë herë)
• Mashtrim me pasoja të rënda (kryer në bashkëpunim, pesë herë)
• Fshehje ose deklarim i rremë i pasurisë dhe interesave private (tre herë)
Ndër të pandehurit e tjerë janë Ermal Kurtulaj, Gazmend Haxhia, Alfred Nikolla, Elton Marini, Bjona Ziaj, Bledar Leka, Marinela Jazoj, Mira Topçiu dhe dy persona juridikë: “Landëays International” sh.p.k dhe “Nine Service Int” sh.p.k, të cilët akuzohen për mashtrim, falsifikim dokumentesh dhe korrupsion aktiv.
Hetimet kanë zbuluar se Ilir Beqaj, në cilësinë e Drejtorit të Përgjithshëm të Agjencisë Shtetërore të Programimit Strategjik dhe Koordinimit të Ndihmës (SASPAC), në bashkëpunim me Ermal Kurtulajn, ka organizuar procedura fiktive prokurimi në kundërshtim me rregullat e BE-së për fondet IPA.
Në vitet 2022-2023, SASPAC ka zhvilluar tendera për organizimin e disa konferencave, ku fituesit ishin paracaktuar paraprakisht dhe procedurat ishin thjesht formale.
Hetuesit kanë provuar se shoqëritë përfituese nuk kishin ofruar realisht shërbimet e prokuruara, por kishin bashkëpunuar me zyrtarët për të përfituar fonde në mënyrë të paligjshme.
Gjithashtu, hetimet kanë zbuluar se Ilir Beqaj ka fshehur pasuri dhe nuk ka deklaruar investime të kryera në kompaninë “Albanian Food and Hospitality Services” sh.p.k, si dhe ka mbajtur të fshehur pronësinë e një apartamenti në Vlorë dhe të një automjeti.
Në kuadër të hetimeve, SPAK ka vendosur sekuestron mbi:
• 14.3 milionë lekë
• 15,542 euro
• 42,318 dollarë
• 19.4% të kuotave në “Albanian Food and Hospitality Services” sh.p.k
• Tre automjete
• Një apartament në Lungomare, Vlorë
SPAK njofton se hetimet për këtë çështje do të vazhdojnë, pasi janë zbuluar indicie për shkelje të tjera të mundshme ligjore.