Kryesia e Partisë Demokratike ka nisur mbledhjen në selinë blu, ndërsa lajme të papritura bëhen me dije.
Veç kandidaturave tashmë të njohura, janë edhe 4 emra të tjerë, të panjohur që do të sfidojnë Lulzim Bashën në garën për kreun e ri të PD-së. Ata do të jenë Admir Mulaj, Edmond Vrapi, Sabri Hoxha dhe Mirjan Jashanllari.
Deri tani kishin shpallur zyrtarisht kandidaturën Fatbardh Kadilli, Edit Harxhi, Ibsen Elezi dhe Agron Shehaj, ndërsa emra të tjerë i shtohen listës. Mësohet se kreu aktual i PD, Lulzim Basha nuk është i pranishëm në mbledhje për shkak të konfliktit të interesit, ndërsa ka autorizuar dy nën/kryetarët dhe Sekretarin e Përgjithshëm, Gazmend Bardhin për të drejtuar mbledhjen.
Kujtojmë që zgjedhjet për kryetarin e ri të Partisë Demokratike do të mbahen në 13 qershor. Shumë figura të njohura brenda PD kanë kërkuar dorëheqjen e Bashës nga drejtimi i partisë, pasi humbi në zgjedhjet e 25 prillit. Ndër to ka qenë edhe Fatbardh Kadilli, që kandidon për kryetar të PD e po ashtu edhe Edit Harxhi. Ndër figurat kritike të Bashës, ka qenë edhe ish-presidenti Bujar Nishani që i ka kërkuar atij dorëheqjen pas rezultatit të dobët në zgjedhje. Megjithatë Nishani nuk shpalli kandidaturë të kryetar të PD.
