Ashtu edhe siç u paralajmërua ditën e djeshme, sot do të mblidhej Këshilli Bashkiak i Tiranës për të marrë vendimin rreth dhënies me koncesion të administrimit të parkingjeve në kryeqytet.
Të ndodhur para këtij fakti, Këshilltarët e Lëvizjes Socialiste për Integrim janë larguar nga mbledhja, ndërkohë që Arbën Mazniku ka thënë se s’kemi të bëjmë me asnjë koncesion të ri, vetëm një mënyrë e re për të marrë automatet ku qytetarët mund të paguajnë biletën.
Përpos Maznikut ka folur edhe Eridian Salianji, përfaqësuesi i PS-në në Këshillin Bashkiak, i cili tha se ligji “Për një shtesë në vendimin Nr 49, datë 11.11.2015 “Për miratimin e kritereve të përcaktimit të zonave të administrimit të parkimit dhe nënzonave të destinuara për parkim, si dhe tarifave të shërbimit të parkimit të administruar nga Bashkia e Tiranës, të ndryshuar”, nuk ka për qëllim të privatizojë apo të japë me koncesion shërbimin e parkimit në kryeqytet.
Ashtu si edhe në deklaratën e mbrëmshme të bërë publike nga Erion Velia, Salianji, ka sqaruar edhe një herë se aktualisht qytetarët e Tiranës e paguajnë parkimin përmes dy opsioneve: asaj me sms nga telefoni i tyre dhe direkt te inspektori përkatës i Tirana Parking. Këtyre opsioneve i shtohet edhe një opsion i tretë nga Bashkia e Tiranës, e cila ka propozuar vendosjen e pajisjeve vetëshërbyese (automatë) dhe aplikacione të ndryshme, në vendet e destinuara për parkim, të cilat mund të punojnë gjatë periudhës kur shërbimi i parkimit është aktiv, si një metodë e thjeshtë dhe efektive për verifikimin e tarifës së parkimit, njësoj si në çdo vend tjetër perëndimor.
“Ashtu siç funksionon edhe sot, pagesa që do të kryhet përmes këtij shërbimi do të kalojë 100% për llogari të Bashkisë së Tiranës”,- ka sqaruar ai.
Megjithatë vetvetiu lind pyetja, mbi çfarë bazash po ndërtohet kjo marrëdhënie, pasi në asnjë moment nuk përmendet se kompania private është duke i dhuruar këto makineri për qytetin?
