Shqiptarët kanë treguar solidaritet të jashtëzakonshëm për Luis Meçjan, i cili kërkoi ndihmë për mbledhjen e fondeve për kurimin e tij pas ngjarjes tragjike që tronditi vendin.
Përmes platformës “GoFundMe”, brenda pak orësh u mblodhën 75 mijë euro, shumë pranë objektivit prej 80 mijë eurosh të përcaktuar nga fushata.
Luisi, që mbeti i plagosur rëndë pasi u godit me thikë të paktën katër herë nga autori i dyshuar i vrasjes së shokut të tij Martin Cani, bëri një apel prekës për ndihmë, duke përmendur vështirësitë ekonomike të familjes.
Kjo thirrje mobilizoi qindra persona që kontribuan për mbështetjen e tij.
Ndërkohë, Spitali i Traumës ka deklaruar se Luisi nuk ka nevojë të transferohet jashtë vendit, pasi gjendja e tij shëndetësore është e stabilizuar dhe po merr trajtimin e nevojshëm në Shqipëri.
Ngjarja e rëndë, ku humbi jetën Martin Cani dhe u plagos Luis Meçja, ka tronditur opinionin publik, duke nxitur një valë mbështetjeje për të mbijetuarin dhe familjen e tij.
