Federata Shqiptare e Futbollit mirëpriti një ditë më parë në Tiranë mbledhjen e rëndësishme të UEFA për Qëndrueshmërinë Mjedisore dhe Përgjegjësinë Sociale.
Armand Duka, Presidenti i Federates Shqiptare të Futbollit mbajti një fjalë përshëndetëse, dhe theksoi se të gjithë jemi të angazhuar për të krijuar një të ardhme më të mirë.
“Në emër të UEFA-s dhe Federatës Shqiptare të Futbollit, kam kënaqësinë të mirëpres këtu përfaqësues nga të 55 federatat anëtare të UEFA për këtë takim të veçantë të drejtuesve të qëndrueshmërisë sociale dhe mjedisore.
Jam i nderuar të qëndroj para jush, ndërsa jemi mbledhur këtu bashkë me një angazhim për të krijuar një të ardhme më të mirë dhe më të qëndrueshme për futbollin evropian dhe komunitetet tona. Vitet e fundit kemi qenë dëshmitarë të sfidave, por edhe të mundësive që nxjerrin në pah rëndësinë e qëndrueshmërisë sociale dhe mjedisore, si brenda dhe jashtë fushës– tha Duka
“Takimi i sotëm ka një rëndësi të madhe, sepse ne mund të përfshihemi në diskutime dhe të zbulojmë praktikat më të mira që do të nxisin ndryshime dhe përmirësime ne te ardhmen. Dhe EURO 2024 ishte një shembull i shkëlqyer dhe një sukses i madh kur bëhet fjalë për të qenë të qëndrueshëm.Dëshiroj të shfrytëzoj rastin për të falënderuar veçanërisht mikun tim dhe tonin Michele, Drejtor i Qëndrueshmërisë Sociale dhe Mjedisore dhe ekipin e tij, së pari për një punë të mrekullueshme në këto vite dhe së dyti për organizimin e këtij seminari në Tiranë. Faleminderit dhe njëherë që keni ardhur këtu dhe për angazhimin tuaj në lojën e bukur të futbollit dhe shijoni qëndrimin tuaj në Tiranë”, – u shpreh Duka në fjalën e tij.
