Gjatë ditës së sotme është mbajtur mbledhja në Komisionin Hetimor ku në fokus kishte Inceneratorët. Deputetet Ermonela Felaj dhe Jorida Tabaku kanë debatuar me tone të larta për inceneratorët e Fierit, ndërsa deputetja e PD-së nuk ka harruar të ‘thumbojë’ qeverinë për Lefter Kokën i cili akuzohet se mori 3.7 mln euro për inceneratorin e Elbasanit. Në videon më poshtë dëgjohet që Tabaku i thotë Felajt se ka konflikt interesi për inceneratorin e Fierit, ndërsa shprehet: “Shit Lefter Kokën, mbro gjithë të tjerët…” Tabaku i kujton asaj deklaratën e sekretarit të përgjithshëm të kryeministrisë gjatë një debati televiziv me deputeten Dhurata Çupi.
Kujtojmë se pas arrestimit të Lefter Kokës, i cili u arrestua për llogari të hetimit të SPAK me akuzën se ka përfituar 3.7 milionë euro në mënyrë të paligjshme nga kompanitë koncesionare të inceneratorit të Elbasanit, para që kompanitë i kanë marrë në buxhetin e shtetit, nisën hetimet edhe për inceneratorin e Fierit dhe të Tiranës. Prokurorët e çështjes janë Dritan Premçi dhe Vladimir Mara.
Ndërkohë deputetja ka reaguar edhe dje për inceneratorët. Tabaku deklaroi ditën e djeshme nga Kuvendi se kryeministri Edi Rama i ka konfirmuar pjesëmarrjen në këtë proces. Sipas saj pjese e listës së dëshmitareve është edhe ish-ministri Lefter Koka. Tabaku nënvizoi se do të bëhen vizita në të 3 inceneratorët për të cilat do të prezantohet nga një dosje.
