Së fundmi Kosova duket se po përballet me një valë të fortë infektimesh, ndërkohë që mungesa e vaksinave është mjaft e theksuar.
Të mërkurën u raportuan 568 raste pozitive me COVID-19, që paraqet numrin më të madh të rasteve pozitive ditore këtë vit, por sipas vlerësimit të IKSHPK do te ketë rritje të rasteve ditëve në vijim. Vetëm në Prishtinë u raportuan 233 raste pozitive, ndërsa pati katër të vdekur në të gjithë vendin.
Megjithë numrin e lartë të të infektuarve, vaksina anti-Covid nuk duket askund tashmë kur po shkojmë drejt fundit edhe të javës së parë të marsit. Kujtojmë, se Qeveria e Kosovës kishte premtuar se vaksinat do të mbërrijnë në Kosovë gjatë muajit shkurt.
Numri total i rasteve pozitive është 70.753 raste nga 315.664 persona të dyshimtë në virusin SARS-CoV-2 dhe 1.620 raste të vdekjes.
Numri i përgjithshëm i të shëruarve deri më sot është gjithsej 60.628 raste, kurse numri i rasteve aktive është 8.505.
Kujtojmë se Kosova pritet të sigurojë falas 360 mijë vaksina, kurse pjesën tjetër do ta blejë. Ndërkohë zyrtarë të Organizatës Botërore të SHëndetësisë në Kosovë parashohin që procesi i vaksinimit në Kosovë nuk mund të fillojë para stinës së pranverës.
Në këto kushte, pandemia në këtë shtet pritet të përparojë duke shkaktuar dëme më të mëdha ne jetë njerëzish dhe në sektorët e ekonomisë.
