Policia e Shkodrës ka intensifikuar operacionin “Koordinata”, në kuadër të luftës kundër kultivimit të paligjshëm të kanabisit.
Përmes vëzhgimit ajror me dronë dhe kontrollit nga toka me patrulla këmbësore, janë lokalizuar dhe asgjësuar në total 12,203 bimë dhe fidanë të dyshuar si kanabis sativa në dy njësi administrative.
Në Pult (Shkodër), u gjetën dhe u shkatërruan 455 bimë narkotike. Si pasojë, nisi procedimi penal ndaj një inxhinieri pyjesh, shtetasit A. M., për akuzat e shpërdorimit të detyrës dhe moskallëzimit të krimit.
Në Temal (Vau i Dejës), Policia zbuloi dhe asgjësoi një sipërfaqe shumë më të madhe me 11,748 bimë narkotike.
Në këtë rast u proceduan penalisht tre persona për shpërdorim detyre: kryeplaku i fshatit Kllogjen, Gj. G., si dhe dy punonjës pyjesh, P. Sh. dhe F. G.
Policia thekson se hetimet për identifikimin dhe ndjekjen e autorëve të përfshirë në kultivim vazhdojnë.
