Të paktën 110 persona kanë humbur jetën në Rafah dhe në zona të tjera të Gazës gjatë 24 orëve të fundit, sipas të dhënave nga Spitali Nasser.
Viktimat u raportuan pranë një pike shpërndarjeje ndihmash, ku dëshmitarët palestinezë thonë se forcat izraelite hapën zjarr mbi civilët që po përpiqeshin të siguronin ushqime.
Ushtria izraelite ka mohuar përfshirjen në sulm dhe pretendon se nuk ka pasur të plagosur si pasojë e veprimeve të saj në këtë zonë.
Një zyrtar i Forcave Mbrojtëse të Izraelit tha se janë qëlluar vetëm të shtëna paralajmëruese, pasi turma është konsideruar si një kërcënim.
Që nga fillimi i bllokadës totale të vendosur nga Izraeli në mars, e cila më vonë u zbut pjesërisht në fund të majit, kriza humanitare është përshkallëzuar ndjeshëm. Furnizimet me ushqim, ilaçe dhe karburant janë në nivele kritike, ndërsa Kombet e Bashkuara raportojnë mijëra raste të kequshqyerjes mes fëmijëve.
Zyra e OKB-së për të Drejtat e Njeriut bën me dije se deri tani janë vrarë 798 civilë gjatë përpjekjeve për të marrë ndihma humanitare, shumica pranë pikave të shpërndarjes të administruara nga Gaza Humanitarian Foundation. Si GHF, ashtu edhe autoritetet izraelite kanë mohuar përgjegjësinë, duke i cilësuar këto pretendime si “të pabazuara”.
Ndërkohë, zyra e kryeministrit izraelit Benjamin Netanyahu ka reaguar ndaj një raporti të New York Times, i cili pretendon se Netanyahu ka zgjatur qëllimisht luftën në Gaza për përfitime politike personale.
Sipas gazetës, objektivi i tij ishte rehabilitimi i imazhit të dëmtuar dhe qëndrimi në pushtet. Kryeministri e ka quajtur këtë raport “një shpifje kundër Izraelit, popullit dhe ushtrisë së tij”.
Pamje të publikuara nga vendngjarja tregojnë njerëz që tentonin të merrnin ndihma nën breshëri plumbash. Një burrë deklaron në video se të shtënat zgjatën për rreth pesë minuta. Punonjës të emergjencës në terren kanë akuzuar trupat izraelite për “vrasje me gjakftohtësi”.
Ndërkohë, ofensiva ushtarake izraelite ndaj Hamasit ka rifilluar pas përfundimit të një armëpushimi dy mujor, me qëllimin, sipas autoriteteve izraelite, për të ushtruar presion mbi grupin militant palestinez që të lirojë pengjet izraelite.
Ndërsa lufta vazhdon, situata humanitare për civilët në Gaza mbetet dramatike.
