Ditën e sotme policia ka arrestuar administratorin e Kallmetit Besnik Simoni, i cili mbeti i plagosur me 3 plumba gjatë ditës së djeshme.
Arrestimi i tij është bërë për shkak se gjatë konfliktit ku mbeti i plagosur, ka pasur shkëmbim zjarri me shtetasin Altin Marku, i cili po ashtu mbeti i plagosur.
Marku u arrestua disa orë pas ngjarjes nga Policia e Lezhës, teksa fshihej në banesën e një të afërmi të tij në Kallmet.
Fillimisht ngjarja u trajtua si një plagosje në pritë e Simonit, por nga hetimet rezultoi se gjatë konfliktit janë përdorur dy armë, dhe të dy personat e përfshirë kanë mbetur të plagosur.
Policia ka sekuestruar vetëm një nga dy armët që janë përdorur nga Simoni dhe Marku.
Besnik Simoni mbante prej disa vitesh detyrën e administratorit të Kallmetit, dhe konflikti me Markun ka nisur shumë kohë më parë, për të vazhduar gjatë paradites së djeshme.
Pas një konflikti që kanë pasur në zyrën e Simonit, Marku ka qëlluar disa herë në drejtim të makinës së administratorit të Kallmetit, ndërsa edhe vetë ky i fundi është përgjigjur me armë.
Njoftimi i policisë:
Në vijim të veprimeve hetimore dhe operacionale të kryera për zbardhjen e rrethanave të ngjarjes së ndodhur më datë 01.04.2022, në Kallmet të Lezhës, ku si pasojë e një konflikti me armë zjarri mbeti i plagosur kryetari i Njësisë Administrative Kallmet, shtetasi B. S., shërbimet e Policisë, pas disa orë kërkimesh, kanë bërë të mundur kapjen dhe arrestimin e shtetasit A. M., i cili në momentin e kapjes është konstatuar se ka qenë i plagosur me armë zjarri, për këtë arsye është transportuar në Spitalin e Traumës Tiranë.
Si rezultat i veprimeve të thelluara hetimore, u bë e mundur zbardhja e rrethanave të ngjarjes, ku ka rezultuar se: Më datë 01.04.2022, rreth orës 13:15, në fshatin Kallmet, Lezhë, pas një konflikti për motive të dobëta, shtetasit e lartpërmëndur kanë qëlluar me armë zjarri pistoleta, në drejtim të njëri-tjetrit dhe për pasojë ka mbetur i plagosur shtetasi B. S., i cili pasi ka marrë ndihmën e parë mjekësore në Spitalin Rajonal Lezhë, është transportuar në Spitalin e Traumës Tiranë, ku ndodhet në gjendje të rëndë shëndetësore, ndërsa shtetasi A. M. është larguar menjëherë nga vendi i ngjarjes, duke u fshehur për disa orë, deri sa është lokalizuar dhe është arrestuar nga shërbimet e Policisë.
Në përfundim të veprimeve u bë arrestimi në flagrancë i shtetasve: A. M., 41 vjeç, banues në fshatin Kallmet-Lezhë, i dyshuar për veprat penale “Vrasja me dashje”, e mbetur në tentativë dhe “Prodhimi dhe mbajtja pa leje e armëve dhe municionit luftarak”;
B.S., 42 vjeç, banues në fshatin Kallmet, Lezhë, me detyrë administrator i Njësisë Administartive Kallmet, Bashkia Lezhë, i dyshuar për veprat penale “Vrasja me dashje”, e mbetur në tentativë dhe “Prodhimi dhe mbajtja pa leje e armëve dhe municionit luftarak”.
Në cilësinë e provës materiale janë sekuestruar: 1 armë zjarri pistoletë, me një krehër me 6 fishekë, e cila dyshohet se është përdorur nga shtetasi A. M., si dhe dy automjete.
Vijon puna për gjetjen e armës tjetër pistoletë, të përdorur gjatë konfliktit.
Materialet proceduriale i kaluan Prokurorisë së Rrethit Gjyqësor Lezhë, për veprime të mëtejshme.
