Arkivoli me trupin e pajetë të Ilaria Sulës, 22-vjeçares shqiptare që u vra mizorisht nga ish-i dashuri i saj, Mark Anthony Samson, ka mbërritur në banesën e familjes në Viale dello Stadio, Terni. Sot, e reja do të përcillet për në banesën e fundit.
Në hyrje të godinës ku jetonte familja, janë vendosur lule, tabela dhe mesazhe ngushëllimi. Të afërm dhe media të shumta janë mbledhur për të nderuar kujtimin e saj. Nëna e Ilarias, e tronditur nga dhimbja, ka pritur arkivolin me thirrje zemërthyese:
“O Ilaria ime, o vdeksha mami për ty, o Ilaria ime, ku je ti o shpirt i mamit, ku je që nuk ke dritë në sy, ku je mbyllur ti o shpirt i mamit”
Ngjarja tronditëse ndodhi më 25 mars, kur Ilaria u raportua e zhdukur në Romë. Pas disa ditësh kërkimesh, trupi i saj u gjet i futur në një valixhe të hedhur në një humnerë në një zonë të pyllëzuar në Poli. Zjarrfikësit dhe hetuesit e skuadrës kriminale ndërhynë për nxjerrjen e trupit.
Autori i dyshuar, 23-vjeçari filipinas Mark Samson, u arrestua dhe gjatë marrjes në pyetje pranoi krimin.
Ai e kishte goditur Ilariën me thikë në banesën e tij në Via Homs dhe më pas kishte përpjekur të zhdukte trupin. Ndaj tij rëndojnë akuzat për vrasje me paramendim dhe fshehje të kufomës.
Pas krimit, Samson kishte vazhduar të përdorte telefonin e viktimës, duke u përgjigjur mesazheve dhe duke postuar në rrjetet sociale për të fshehur gjurmët.
Ilaria ishte studente e Statistikës në universitetin “La Sapienza” në Romë, dhe largimi i saj i papritur nga banesa dhe heshtja ndaj miqve ngritën menjëherë dyshime. Alarmimi i familjes dhe miqve u pasua nga një mobilizim i gjerë në rrjete sociale për gjetjen e saj, i cili përfundoi me lajmin tragjik.
