Kanë mbërritur në aeroportin e Rinasit 12 870 dozat e radhës të vaksinës Pfizer për Covid-19. Lajmin e ka bërë të ditur kryeministri Edi Rama me anë të një postimi në rrjetet sociale, ku gjithashtu bën të ditur se deri tani në Shqipëri kanë mbërritur në total 773 mijë vaksina.
“Aeroporti “Nënë Tereza” – Sapo kanë mbërritur edhe 12,870 doza të vaksinës Pfizer, duke e çuar në mbi 773 mijë sasinë e vaksinave të ardhura deri tani në Shqipëri
#VaksinimiNukNdalet
#ShqipëriaBuzëqesh”, shkruan kryeministri Rama.
Vaksinimi në Shqipëri ka nisur që prej muajit janar me vaksinat e Pfizer që iu dhuruan Shqipërisë nga një vend i BE. Më pas në vendin tonë kanë mbërritur gjithashtu edhe doza të vaksinës AstraZeneca. Ndërkohë, në muajin mars një vendim i qeverisë i hapi rrugë përdorimit të vaksinave ruse Sputnik V dhe vaksinës kineze të Sinovac, kjo e fundit tashmë e aprovuar edhe nga OBSH për përdorim emergjent.
Aktualisht në vendin tonë shifrat e pandemisë kanë qenë në nivele të ulëta, ndërsa në 24 orët e fundit është raportuar një numër i ulët i infektimeve me Covid-19. Ministria e Shëndetësisë raportoi ditën e sotme se kanë rezultuar pozitivë me koronavirus 17 qytetarë. Ndërkohë, numri i viktimave ka qenë 3, ndërsa aktualisht në spitalet COVID po trajtohen 80 pacientë nga të cilët 9 pacientë janë në terapi intensive.
