Gazetari investigative Artan Hoxha ka qenë i ftuar mbrëmjen e djeshme në emisionin “Repolitiz”, ku është shprehur se edhe pak kohë i duhet për të bërë publike një video ku fisi Çapja në Elbasan ka sulmuar me breshëri plumbash policinë.
Hoxha ka komentuar edhe arrestimet e shoqërimet e djeshme të policisë pas një kontrolli blic në qytetin e Elbasanit.
Ndaj gazetari është shprehur se videoja e tij do të jetë vërtet e frikshme edhe pse ngjarja ka ndodhur në 8 qershor të vitit 2016.
Qytetin e Elbsanit gazetari e ka cilësuar si vendin ku ndodhin më shumë vrasje në Shqipëri, kjo pasi disa banda po e mbajnë nën sundim.
Artan Hoxha u shpreh:
“Elbasani është qyteti që ka më shumë vrasje. Aty ka një numër të madh policësh të vrarë direkt nga mafiat. Çapjat i kanë sulmuar direkt forcat operacionale. Prandaj nuk është përfshirë në operacionin e djeshëm besoj. Është goditur direkt, ka pasur një betejë. Do bëj gati materialin dhe do shikoni që zjarri i hapur mes punonjësve të operacionales dhe pjesëtarëve të një grupi kriminal në Elbasan të duket sikur je në Sinaloa të Meksikës dhe karteli i Sinalos po lufton me gardën meksikane.
Uroj që ky të jetë fillimi dhe jo fundi sepse me të vërtetë Elbasani ka nevojë për ta zbërthyer një herë e mirë dhe për të dhënë drejtë për kaq shumë njerëz të vrarë, dhe familje e fise që kanë ikur nga sytë këmbët nga Elbasani për t’i shpëtuar këtyre njerëzve që mbanin nën sundim qytetin”.
