Në orën 10:00 të mëngjesit, në Sheshin e Shën Pjetrit, Papa Leoni XIV do të kryesojë meshën e parë solemne të papnisë së tij.
Prefektura e Shtëpisë Papnore ka publikuar programin e plotë të angazhimeve për muajin maj, përfshirë disa takime të rëndësishme dhe kremtime liturgjike.
Pas meshës së sotme, Ati i Shenjtë do të drejtojë lutjen mariane “Regina Caeli” nga Lozha Qendrore e Bazilikës së Shën Pjetrit.
Më 20 maj, ditën e martë, Papa Leoni do të marrë në zotërim Bazilikën Papnore të Shën Palit Jashtë Mureve, një akt simbolik në nisje të shërbesës së tij si Peshkop i Romës.
Të mërkurën, më 21 maj, do të mbahet audienca e parë e përgjithshme me besimtarët në Vatikan.
Të shtunën, më 24 maj, Papa do të takohet me anëtarët e Kuries Romake dhe punonjësit e administratës së Shtet-Qytetit të Vatikanit.
E diela, 25 maj, do të jetë një ditë e ngarkuar me ngjarje të rëndësishme: përveç lutjes tradicionale të Mbretëreshës Qiellore, Papa do të marrë në zotërim dy bazilikat e tjera të mëdha ,Shën Gjonin në Lateran dhe Shën Marinë e Madhe, duke përmbyllur kështu simbolikisht hyrjen e tij në rolin e ipeshkvit suprem të Kishës Katolike.
