Boksi patjetër që është sporti i emocioneve gjë që nuk kishte si të ndodhte ndryshe edhe sot në duelin e vendosur mes boksierrit amerikan Floyd Mayweather dhe sportistit të kickboxing, japonezi Tenshin Nasukawa.
Ka qenë një ndeshje me shumë emocione, por që zgjati më pak nga çfarë ishte menduar. Ndeshja ka përfunduar që në raundin e parë ku boksieri amerikan ka fituar me “KO” ndaj japonezit. Ndeshja është zhvilluar në Tokio dhe sfida ishte e vlefshme për eventin “Rizin 14”, që u zhvillua në “Saitama Super Arena” të Tokios, një duel që nuk do të llogaritej në skedën e dy sportistëve.
Mayweather rikthehej në ring pas 18 muajsh, që pas fitores ndaj Conor McGregor, në gusht të 2017-ës. Kjo sfidë e boksierit amerikan ishte më së shumti për para, ndaj një rivali enigmë dhe pak të njohur.
“Ne jemi sërish të dy të pamposhtur dhe u ngjitëm në ring për të argëtuar fansat. Tenshin është ende një sportist i madh, ndërsa unë një sportist tashmë i tërhequr”, tha Mayweather.
