Ditën e sotme, një grup nxënësish kanë dalur në protestë para Ministrisë së Arsimit. Kujtojmë që ditën e djeshme ishte dhe provimi i fundit i Maturës Shtetërore, konkretisht lënda me zgjedhje. Maturantët para Ministrisë së Arsimit kërkojnë ripërsëritje të testit.
Nxënës që kishin zgjedhur lëndë me zgjedhje Biologjinë apo dhe Fizikën, shprehen se pyetjet ishin jashtë programit. Me parulla në duar dhe me thirrje kundër Ministrisë, nxënësit kërkuan si alternativë që të hiqen ato pyetje që kanë qenë jashtë programit.
“Programi për provimin e Biologjisë ishte jashtë programit. Siç ishin ekosistemet. Nuk duam që të na falin pikë, pasi duam që të marrim vlerësimin e drejtë për atë ccka kemi punuar. Ne kërkojmë ribërjen e tekstit. Pikët që i përkasin pyetjeve jashtë programit, kërkojmë që të na eliminohen. Na u premtua se asgjë nuk do të jetë jashtë programit. Testi model nuk kishte lidhje me ato çka na u ofrua me testin e Maturës.”, tha një maturante për ‘Neës24’.
Ndërkohë ministrja Kushi ka drejtuar një mesazh maturantëve:
“Të dashur maturantë, I kam marrë të gjitha mesazhet tuaja dhe i kam ndjekur me vëmendje shqetësimet në lidhje me testin e biologjisë. Më poshtë gjeni linkun me skemën e vlerësimit të zgjidhjeve të publikuar nga QSHA dhe ndërkohë po konsultohemi me mësues dhe ekspertë të fushës për të vlerësuar cilësinë e testit.Për çdo rast, ju sigurojmë që do të marrim të gjitha masat e nevojshme që ju të vlerësoheni sipas meritës dhe nivelit të arritjeve. Suksese!”
