Maturantët nuk e kanë ndaluar protestën e tyre as ditën e sotme, edhe pse Ministria e Arsimit vendosi që të rishikonte tezën e matematikës dhe të ulte nivelin e pikëve për secilën notë.
Ata u mblodhën në orën 17:00 para institucionit përkatës ku mbajtën edhe një deklaratë në të cilën theksonin se nuk kanë nevojë për fjalë, por për paraqitje reale të pikëzimit të provimit. Maturantët janë të vendosur për të mos u ndalur deri në plotësimin e të gjitha kërkesave, ku përfshihet akulimi i VKM-së e cila i jep peshë provimeve rreth 50%, dhe të bëhet 30%.
Deklarata e plotë:
PËRGJIGJE E MATURANTËVE DREJTUAR MINISTRISË SË ARSIMIT Ministria e Arsimit sot bëri me dije se ka ulur pragun e pikëve të provimit të matematikës. Falë protestës së këtyre ditëve, ne ja arritëm të bënim një ndryshim të tillë, por përpjekja jonë nuk do të ndalet me kaq. Ne jemi këtu për t’i kërkuar Ministrisë së Arsimit kërkesat për të cilat duket se ka bërë njërin sy qorr, e njërin vesh shurdh. Ne kërkojmë në mënyrë të menjëhershme që të na tregohet se si është ulur pragu i pikëve. Ne nuk kemi nevojë vetëm për fjalë, por për paraqitje reale të pikëzimit të provimit. Përveç kësaj, ne kërkojmë që të anulohet VKM-ja e cila i jep peshë provimeve rreth 50%. Përpjekja jonë për uljen e peshës së provimeve në 30% do të vazhdojë. Ne duam t’i themi ministres së arsimit se nuk do të ndalemi deri në plotësimin e të gjitha kërkesave. Ne nuk jemi gënjyer dhe s’do të gënjehemi nga premtime të tilla boshe. Gjithë këto ditë kemi kuptuar se forca e ndryshimit qëndron te ne si të rinj dhe banues të shkollave. Tani më shumë se kurrë, ne jemi të gatshëm të luftojmë jo vetëm për vete, por edhe për arritjen e një arsimi cilësor. Për gjimnazin! Për shoqërinë!
