Sot janë publikuar rezultatet e provimit të lëndëve me zgjedhje, testi i fundit i maturës shtetërore pas atij të Matematikës.
Maturantët mund të konsultojnë notat e tyre në mënyrë të thjeshtë përmes sistemit digjital, në linkun zyrtar të Ministrisë së Arsimit.
Në total, këtë provim e kanë zhvilluar 25,872 maturantë në të gjithë vendin. Nga këta, 360 nuk arritën të kalojnë, duke marrë notën 4.00, ndërsa 366 maturantë kanë shkëlqyer me notën maksimale 10.00.
Sipas të dhënave zyrtare, kalueshmëria është shumë e lartë, 98.61%, ndërsa nota mesatare në rang kombëtar është 7.72.
Pritet që brenda pak minutash të bëhen publike edhe detajet përkatëse për çdo qark të vendit, përfshirë notën mesatare dhe statistika të tjera shtesë.
Me përfundimin e këtij provimi, maturantët do të përqendrohen në përzgjedhjen e degës së preferuar për studimet e larta.
