Policia e Tiranës ka vënë në pranga një 50-vjeçare, e dyshuar për mashtrim financiar. Shtetasja E. V. u arrestua pasi akuzohet se i ka marrë 36 000 euro një qytetari, me premtimin se do t’i ndërmjetësonte blerjen e një prone në kryeqytet.
Sipas hetimeve të kryera nga Seksioni për Hetimin e Krimit Ekonomik dhe Financiar, në bashkëpunim me Prokurorinë, rezulton se e dyshuara nuk ka realizuar asnjë veprim për blerjen e pronës, ndërsa pas marrjes së shumës ka ndërprerë kontaktet me viktimën. Kjo ka ngritur dyshime të forta për një skemë mashtrimi të organizuar.
Materialet e çështjes i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme ligjore. Ndërkohë, hetimet vijojnë për të zbardhur të gjitha rrethanat dhe për të identifikuar persona të tjerë që mund të jenë të përfshirë në këtë aktivitet të paligjshëm.
