Karantinimi për 14 ditë dhe testi i COVID-19, vijon të mbetet në fuqi për të gjithë qytetarët shqiptarë rezident apo me leje pune në Gjermani.
Ky lajm është bëri i ditur Ambasada gjermane në Tiranë me anë të një njoftimi në Facebook ku thuhet se me të mbërritur në Gjermani qytetarët mund ta kryejnë testin e COVID-19 falas brenda 72 orëve.
Gjithashtu sipas Institutit Robert Koch, Shqipëria konsiderohet zonë e kuqe për shkak të rasteve me koronavirus dhe për këtë arsye shqiptarët janë të detyruar të tregojnë adresën ku qëndrojnë, por edhe të kryejnë tamponin në hyrje.
“Vlen edhe më tej Detyrimi për karantinë dhe testi i koronavirus për udhëtarët nga Shqipëria. Meqenëse Shqipëria vazhdon të kosiderohet një zonë rreziku nga Instituti Robert Koch, të gjithë ata që hyjnë në Gjermani janë të detyruar që menjëherë pas mbërritjes të nisen direkt drejt vendbanimit të tyre ose një strehimi tjetër të përshtatshëm (p.sh. hotel) dhe të qëndrojnë atje për një periudhë prej 14 ditësh pas hyrjes së tyre (karantinë).
Udhëtarët që hyjnë në Gjermani janë gjithashtu të detyruar të informojnë autoritetin shëndetësor përgjegjës për ta mbi adresën e tyre të qëndrimit në Gjermani. Ata janë gjithashtu të detyruar që me kërkesë të autoriteteve të paraqesin rezultatet e testimit për koronavirusin e ri. Ju mund të testoheni falas brenda 72 orëve nga mbërritja juaj, edhe nëse nuk keni marrë ende një kërkesë të tillë. Kjo është e mundur në shumë aeroporte në Gjermani”, thuhet në njoftimin e Ambasadës Gjermane.
