Detaje të reja kanë dalë në dritë nga ngjarja e ndodhur dy ditë më parë në Kavajë.
Pas një sherri në banesën e Marsida Qatjas, 41-vjeçari Dritan Haxholli mbeti i vrarë, ndërsa u plagos shefi i sigurisë në burgun e Durrësit, Bledar Toçi.
Marsida ka dhënë dëshmi kontradiktore përsa i përket lidhjes me Toçin dhe Haxhollin.
Për këtë të fundit ajo ka thënë përpara hetuesve se e ka pasur të dashur, ndërsa përpara mediave e ka mohuar një gjë të tillë.
Mirëpo familjarët e Dritanit kanë hedhur poshtë variantet e rrëfyera nga 30-vjeçarja.
Fillimisht ishte nipi i tij dhe tashmë kushërira Irida Koçi, shkruan “Faxweb”.
Kjo e fundit është shprehur për mediat, se mes Marsidës dhe Dritanit ka pasur një lidhje.
Ajo ka shtuar se Marsida shkonte shpeshherë te shtëpia e Dritanit dhe ato që ka deklaruar nuk janë të vërteta.
“Marsida është kontradiktore në atë që thotë, ne nuk duam hakmarrje, thjesht duam që të dalë në dritë e vërteta. Marsida Qatja dhe Dritan Haxholli kanë qenë të dashur, ajo është kontradiktore në ato që thotë. Dritani ka qenë i dënuar në Greqi, por nuk e di arsyen. Po një lidhje sentimentale dhe e di informacionin nga mamja e Dritanit, që Marsida shkonte shpesh herë te shtëpia e Dritanit. Pra nuk është ashtu sikur e ka deklaruar ajo. Unë i shkrova edhe në Facebook, dhe më është përgjigjur që e kisha thjeshtë shok dhe kaq”, shprehet kushurira e 41-vjeçarit.
Për shkak të dëshmive kontradiktore, por edhe për faktin se në banesën e saj është gjetur kokainë, ajo është rimarrë sërish në pyetje nga Prokuroria e Kavajës.
Natën e krimit në banesë ndodheshin edhe 2 komshinj të saj, si dhe 3 fëmijët e mitur.
