Sekretari organizativ i Partisë Socialiste Arben Pëllumbi ka folur në studion e ABC në lidhje me ofertën e kryeministrit Edi Rama për të bashkëpunuar me Partinë Demokratike. Pëllumbi deklaroi se ky proces është ende në fazën e deklaratave nga të dyja palët dhe nuk është deshifruar ende në terma konkretë, përveç asaj për zgjedhjen e një presidenti konsesual të artikuluar nga vetë kryeministri Edi Rama.
“Thashethemet dhe zhurmat që kanë prodhuar konflikte të panevojshme mendojmë se është e tepërt. Oferta që po bëjmë është të gjejmë dakordësinë për disa gjëra. Nuk bëhet fjalë për të lënë vendin pa opozitë por për të gjetur gjuhë bashkëpunimi për reformat ë caktuara. Gjuha me të cilën ne komunikojmë me njëri tjetrin nuk duhet të jetë një gjuhë e ashpër.
Fillimisht duhet të biem dakord për parimet. Kryeministri e ka deklaruar se jemi të hapur për çfarëdolloj bashkëpunimi. Por fillimisht duhet të jemi të hapur të dyja palët. Unë jam përfaqësues i PS dhe di që jemi ende në fazën e deklaratave. Jemi në proces të mosnjohjes së rezultatit të zgjedhjeve domethënë që nuk kemi hedhur hapin e parë.
Dalëngadalë shikohen fushatë, ligjet, kodet. Gjërat për të cilat do punohet bashkarisht që të kemi një rezultat sa më pozitiv të politik së brendshme të vendit. Ne patëm një proces zgjedhor që ishte ndër më të mirët dhe më të qetët. Në 5199 komisionet, procesverbalet janë firmosur nga të gjitha palët pa asnjë lloj objeksioni. Në rast se do kishte vërejtje duhet të ishin materializuar në këto lloj dokumentesh. Ka një mungesë kohezioni dhe pjekurie politike në raport me procesin e zgjedhjeve. Prisja që pas 30 vitesh eksperiencë në pluralizëm të mund të kishim që humbësi të uronte fituesin me një zgjedhje paszgjedhore normale”, u shpreh Pëllumbi.
Ai theksoi se hapi i parë është njohja e zgjedhjeve nga partia demokratike dhe deklarata publike në lidhje me ofertën. Pëllumbi theksoi se për sa kohë nuk ka asnjë hap para nga pala tjetër, fleta e bardhë ende nuk është mbushur, duke mos përjashtuar këtu as mundësinë e përsëritjes së zgjedhjeve lokale të cilat në vitin 2019 u bënë pa opozitën.
“Çdo marrëveshje është në tavolinë për t’u realizuar. Jemi akoma shumë larg dhe as në gjysmën e hapit të parë. PD duhet të njohë rezultatin e zgjedhjeve dhe të bjerë dakord me maxhorancën. Për PS zgjedhjet janë në vitin 2023 dhe për sa kohë nuk kemi asnjë tratativë bisede nuk ka asnjë ndryshim. Plani B është ai që na besuan qytetarët, Ne do vazhdojmë të qeverisim. Opozita pasi t’i kalojë dehja nga humbja se mbi interesat politikë është me e rëndësishme e ardhmja e fëmijëve tanë”, deklaroi Pëllumbi.
Ndalur te nisma për shkarkimin e presidentit, ai u shpreh se procesi nuk ka lidhje me Metën si individ por me deklaratat e njëpasnjëshme të bërë prej tij në publik të cilat sipas socialistëve kanë cenuar rendin kushtetues.
“Presidenti ka mbajtur disa qëndrime të cilat në këndvështrimin tonë janë në shkelje të hapur. Ai bën edhe thirrje për prishje të rendit kushtetues. Shqipëria është republikë parlamentare dhe është ai që gjykon veprime të caktuar. Presidenti shkarkohet nga parlamenti. Pastaj ky shkarkim do vlerësohet nga Gjykata Kushtetuese. Për PS nuk ka rëndësi pozicioni që do mbajë Meta si individ. Për këtë është beteja që jemi duke bërë dhe jo betejë personale me Metën.
Jemi duke folur për një proces të shkeljeve të rënda në lidhje me zgjedhjet dhe ky proces sapo përfundoi dhe parlamenti do vazhdojë të bëjë detyrën e vet. Është një parlament i mandatuar deri në shtator. Ne mendojmë që presidenti ka shkelur kushtetutën”, u shpreh ai.
