Ditët e fundit ka qenë në fokus të të gjithë opinionit publik marrëveshja Rama-Meloni për strehimin e emigrantëve në vendin tonë. Një marrëveshje kjo e cila po mbahet e papublikuar se për çfarë kushtesh kanë rënë dakord dy palët.
Lidhur me këtë situatë ka folur kryeministri i vendit, Edi Rama në një intervistë në emisionin italian në Rete 4 “Dritto e Rovescio”, duke siguruar të gjithë se kjo marrëveshje është e mirëmenduar dhe e formuluar me kujdes.
Rama hodhi poshtë pretendimet se në Shqipëri do të vijnë vetëm burra, ai tha se në kampin e vendosur në vendin tonë do të jenë edhe fëmijë dhe gra shtatzëna.
Ndër të tjera, Rama siguroi se kjo marrëveshje nuk është bërë për të përfituar diçka, por për t’i dhënë një ndihmë Italisë.
“Jemi në mes të Evropës. Na ndan një det i bukur nga Italia. Ne jemi një shtet evropian dhe duam të jemi pjesë e BE-së. Ka qenë ëndrra jonë që kur kemi shpëtuar nga makthi i diktaturës komuniste. Por kjo marrëveshje nuk është bërë për të përfituar diçka. Sa herë na ka ndihmuar Italia? Vjen një ditë që Italia thotë se ka një problem. Ne jemi shumë të vegjël për të qenë një zgjidhje, por duhet të japim një dorë për të nderuar miqësinë e thellë që na lidh me Italinë. Kushdo që thotë se Rama hapi derën për të hyrë i pari në BE, nuk di të trokasë as në Bashkimin Europian”, u shpreh ai për Rete 4.
