Në mbledhjen e asamblesë së zhvilluar me videokonferencë, për të diskutuar çështje të ndryshme të Ballkanit dhe Europës, Partia Popullore Europiane ka përmendur dhe ndryshimet kushtetuese që po bën mëxhoranca përpara zgjedhjeve të 25 prillit.
Në një deklaratë zyrtare, PPE thekson se zgjedhjet e lira dhe të ndershme të 2021 do të jenë parakusht për integrimin e Shqipërisë në BE. Po ashtu bëhet thirrje për zbatimin e ndryshimeve në Kodin Zgjedhor siç është rënë dakord mes palëve politike në “5 qershor”, pasi ndryshimet e njëanëshme, siç theksohet, janë kundër rekomandimeve të OSBE-ODIHR.
Deklarata e plotë
PPE mbështet plotësisht udhërrëfyesin e Shqipërisë drejt integrimit në BE, duke përfshirë zgjedhjet e lira dhe të ndershme si një parakusht themelor. Reforma zgjedhore e 5 qershorit u miratua në mënyrë konsensuale dhe u mbështet ndërkombëtarisht dhe duhej të zbatohej siç ishte rënë dakord. Ndryshimet e njëanshme në këtë fazë janë kundër rekomandimeve të OSBE / ODIHR si dhe vendimit të Këshillit të BE për hapjen e negociatave të pranimit. EPP nxit autoritetet të përmbahen nga çdo ndryshim i njëanshëm dhe të respektojnë marrëveshjen konsensuale siç është zotuar.
