Vrasja makabre e Ilaria Sulës nga ish-i dashuri i saj, Mark Antony Samson, vazhdon të mbajë vëmendjen e mediave italiane, me detaje të reja që po dalin çdo ditë.
Pas vrasjes së studenten shqiptare, 23-vjeçari filipinas dukej se synonte të nisë një jetë të re, duke vazhduar të njihej me vajza të tjera.
Njëra prej tyre ka rrëfyer në “Rai 3” se Samson i dërgonte mesazhe para dhe pas vrasjes së Ilarias. Filipinasi i kishte thënë asaj se po kalonte një periudhë të vështirë pas ndarjes me Ilarian dhe kërkonte të njihej me njerëz të rinj.
“Ai më pyeti nëse qëndroja me dikë në shtëpi dhe më 25 mars (një ditë përpara vrasjes së Ilarias) po kërkonte me ngulm që të më takonte. Një mbrëmje, ai kërkoi që të vinte në shtëpinë time dhe të sillte alkool. Por unë refuzova duke thënë se i dashuri im ndodhej në shtëpi, vetëm e vetëm që ai mos të vinte”, u shpreh vajza.
Në datën 27 mars, kur të gjithë po kërkonin Ilarian, Marku vazhdoi t’i shkruante asaj, duke përdorur telefonin e viktimës për të dërguar mesazhe familjarëve dhe miqve të Ilarës.
Më pas, e reja mori një mesazh nga një mikeshë, e cila e informoi se Marku ishte ish-i dashuri i Ilaria Sulës.
“Gjëja e parë që më erdhi në mendje ishte: ‘Kjo mund të më kishte ndodhur mua’”, tha ajo, duke kujtuar momentin kur zbuloi të vërtetën.
Ajo tregoi se Marku i kishte dërguar foto, përfshirë një të bërë në zonën Furio Camillo, ku ajo jetonte.
Qëndrimi i tij i vazhdueshëm dhe këmbëngulës e bëri vajzën të dyshonte, pasi ai insistonte që të flisnin dhe vazhdonte t’i dërgonte fotografi.
Pavarësisht se ajo nuk iu përgjigj, 23-vjeçari nuk e ndali këmbënguljen, duke vazhduar t’i dërgonte mesazhe dhe telefonata.
Edhe pas vrasjes së Ilarias, Marku nuk u ndal, dhe kërkonte ende të takonte vajzën.
