Tirana do të mirëpresë këtë fundjavë edicionin e nëntë të Maratonës së Tiranës, aktivitetin më të madh sportiv të kryeqytetit, që do të mbahet më 19 tetor 2025. Për zhvillimin e garës, Bashkia Policia e Shtetit kanë hartuar një plan masash për devijimin e trafikut dhe kufizimin e lëvizjes së automjeteve.
Sipas njoftimit zyrtar, kufizimet e qarkullimit do të jenë në fuqi nga ora 08:00 deri në 16:00 të datës 19 tetor, ndërsa një ditë më parë, më 18 tetor, nga ora 09:00 deri në 11:00, do të zhvillohet aktiviteti “Maratona Fan Run”, që nis në sheshin “Nënë Tereza” dhe vijon deri në fund të bulevardit “Dëshmorët e Kombit”.
Kufizimet për “Maratona Fan Run”, 18 tetor 2025
Lëvizja e automjeteve do të ndalohet në segmentet kryesore të bulevardit “Dëshmorët e Kombit”, si dhe në rrugët “Papa Gjon Pali II”, “Ismail Qemali”, “Abdyl Frashëri”, “Ibrahim Rugova” dhe “Lek Dukagjini”. Automjetet do të devijojnë drejt rrugëve “Myslym Shyri”, “Bajram Curri”, “Sami Frashëri” dhe “Gjergj Fishta”.
Linjat urbane që preken do të devijojnë sipas itinerareve alternative, përfshirë linjat “Selitë–Allias”, “Kodra e Diellit–Allias”, “Teg–Sauk–Ish Stacioni i Trenit”, “Kashar–Qendër” dhe “Qyteti Studenti–Jordan Misja”, të cilat do të ndryshojnë drejtimin në segmentet pranë sheshit “Willson”, rrugës “Kavajës” dhe bulevardit “Zogu I”.
Kufizimet për “Maratonën e Tiranës 2025”, 19 tetor 2025
Në ditën e garës kryesore, nga ora 08:00 deri në 16:00, do të ndalohet qarkullimi në një sërë akseve që përfshijnë sheshin “Nënë Tereza”, bulevardin “Dëshmorët e Kombit”, rrugën “Gjergj Filipi”, “Papa Gjon Pali II”, “Ismail Qemali”, bulevardin “Bajram Curri”, “George W. Bush”, “Abdi Toptani”, “Zogu I”, “Bulevardi i Ri”, “Ded Gjo Luli”, “Kavaja”, “Myslym Shyri”, “Zhan D’Ark”, “Ibrahim Rugova” dhe “Lek Dukagjini”.
Lëvizja e mjeteve do të devijohet në Unazën e Mesme dhe rrugët anësore si “Luigj Gurakuqi”, “Dibra”, “Mine Peza”, “Fortuzi” dhe “Vaso Pasha”. Qarkullimi në këto akse do të drejtohet sipas orientimeve të Policisë Rrugore, me drejtim të detyruar djathtas ose majtas në disa kryqëzime.
Edhe linjat urbane do të pësojnë ndryshime të përkohshme. Linjat “Selitë–Allias”, “Kodra e Diellit–Allias”, “Qyteti Studenti–Jordan Misja” dhe “Linja e Gjelbërt” do të pezullohen përkohësisht. Ndërsa linjat e tjera, si “Teg–Sauk–Ish Stacioni i Trenit”, “Kashar–Qendër” dhe “Kombinat–Kinostudio”, do të devijohen në rrugët “Elbasanit”, “21 Dhjetori”, “Vasil Shanto” dhe “Karl Topia”.
Në këtë ditë do të ndalohet gjithashtu qarkullimi i mjeteve të transportit të përzier, mjeteve teknologjike dhe atyre të transportit të pasagjerëve (me përjashtim të urbanëve qytetas) brenda unazës së madhe, nga ora 08:00 deri në 16:00.
Gjatë gjithë kohës së aktivitetit, qarkullimi i mjeteve të emergjencës dhe Policisë së Shtetit do të vazhdojë normalisht në të gjitha segmentet e përcaktuara.
Ky plan masash synon të sigurojë mbarëvajtjen e aktivitetit sportiv dhe sigurinë e pjesëmarrësve dhe qytetarëve gjatë zhvillimit të Maratonës së Tiranës.
