Ditën e sotme kryeministri edi Rama teksa zhvilloi një konferencë për shtyp në mënyrë të përsëritur e vendosi theksin tek lirimi i 3 efektivëve të Policisë së Kosovës që po mbahen peng në Serbi. Këtë herë Rama i përshkallëzoi tonet duke thënë se nëse kjo gjë nuk bëhet Shqipëria do të ndërpresë marrëdhëniet diplomatike me Serbinë.
Ndërkohë që pas kësaj deklaratë ka reaguar ish-ministri i kabinetit ‘Rama 1’, Ylli Manjani i cili kërkon nga kryeministri që të liroj Fredi Belerin. Pasi sipas Manjanit Rama duhet të lër policët e Kosovës dhe të lejoj të zgjedhurin e Himarës të shkojë në zyrë.
Manjani shkruan se Fredi Beleri mbahet në paraburgim pa asnjë argument bindës dhe në kundërshtim flagrant me ligjet e shkruara të këtij shteti.
Postimi i Manjanit:
Lëri policët e Kosovës që ka arrestuar Vuçiçi, po lejo të zgjedhurin e Himarës të shkojë në zyrë, o zotni! Rrespekto pa kushte vullnetin e popullit tënd njëherë, pastaj jep mend për punët e të tjerëve.
Fredi Beleri mbahet në paraburgim pa asnjë argument bindës dhe në kundërshtim flagrant me ligjet e shkruara të këtij shteti.
Mbahet në paraburgim me sajesa policësh të qeverisë dhe së fundi edhe me dëshmi penaliteti fallco.
Mbahet në paraburgim në dhunim të plotë të Kushtetutës së Shqipërisë, të Lirive e të drejtave themelore dhe gjithashtu të parimit Europian të autonomisë vendore.
