Ish ministri i Drejtësisë Ylli Manjani ka reaguar në lidhje me arrestimin e Jamarbër Malltezit dhe procedimin në gjendje të lirë të ish kryeministrit Sali Berisha. Sipas Manjanit SPAK për 3 vite hetime ende nuk ka siguruar një provë të vetme që të ngrejnë akuzë zyrtare. Ai thekson se kur po shkohej drejt shterrimit të afateve procedurale, thjesht merren disa masa shtrënguese për persona nën hetim, jo për të pandehur. ‘Ja edhe opozitën e shkatërruan, por (pa)drejtësia e re do vijojë me ta, me të njëjtën pamëshirësi’, e përfundon Manjani reagimin e tij në Facebook.
Nga Ylli Manjani
Pra, që ta kuptojmë tamam, regjistrohet një çështje penale në 2020 dhe pas 3 viteve hetime ende nuk kanë siguruar një provë të vetme që të ngrejnë akuzë zyrtare.
Pas 3 vitesh, pra kur po shkohej drejt shterrimit të afateve procedurale, thjesht merren disa masa shtrënguese për persona nën hetim, jo për të pandehur.
E përsëris: personat nën hetim, pavarësisht barazisë në të drejtat procedurale, NUK JANË TË PANDEHUR. Dmth NUK JANË NËN AKUZË.
Sepse që të ngrihet akuzë duhen prova jo hamendësime kallëzimesh politike e popullore.
Pyetja që shtrohet është:
A është standard demokratik dhe kushtetues arresti me burg, pra heqja e lirisë, ndaj personave për të cilët shteti nuk ka asnjë provë fajsie?! A mund të mbahet në burg personi pa prova?!
Kam kohë që e ngre këtë çështje. Nuk e kam lënë për situata VIP…
I sugjeroj socialistëve, falangjeve të tyre në sistemin e drejtësisë, ta rishohin këtë mungesë standardi e garancie, sepse do t’u bjerë atyre në kokë tashmë.
Ja edhe opozitën e shkatërruan, por (pa)drejtësia e re do vijojë me ta, me të njëjtën pamëshirësi.
