Ka përfunduar manifestimi i organizuar nga presidenti Meta, i cili mblodhi qytetarët në bulevardin ‘Dëshmorët e Kombit’.
Presidenti tha se nëse nuk merret seriozisht dekreti i firmosur sot për kthimin e ligjit për gjyqtarët dhe prokurorët dhe betimin e tyre, atëherë do të hyjë në sallën e Kuvendit, ku do të firmosë dekretin për shpërndarjen e parlamentit.
Në podium, përveç flamurit shqiptar, ishte edhe ai amerikan.
Mirëpo, kjo gjë nuk i ka pëlqyer ambasadores së SHBA, Yuri Kim, e cila reagoi menjëherë me anë të një statusi në Twitter.
Kim ka sqaruar se ambasada nuk ka asnjë lidhje me manifestimin dhe se ishte surprizuar që kishte parë flamurin amerikan.
“U befasova kur pashë flamurin amerikan në “manifestimin” e sonte. Për të shmangur çdo konfuzion, dëshirojmë të sqarojmë se ndërsa SHBA mbështesin të drejtën e protestës paqësore, ne nuk kemi asnjë lidhje me “manifestimin” të sonte,”-shkruan Kim.
Pas këtij statusi nuk ka vonuar as përgjigja e qeverisë dhe reagimi i parë erdhi nga zv.kryeministri Erjon Braçe.
Braçe ka shpërndarë në rrjetet e tij sociale, statusin e ambasadores amerikane Yuri Kim, e cila u shpreh se SHBA-të nuk kishin asnjë lidhje me tubimin e sotëm.
“Shpulla e parë amerikane,”-shkruan në reagimin e tij zv.kryeministri Braçe.
Ashtu sikurse ishte parashikuar manifestimi i organizuar nga presidenti Meta ka përfunduar në orën 19:00.
Ai që tërhoqi vëmendje është fakti që në podium u ngjitën figura të njohura të kulturës dhe sportit, si: Bujar Kapexhiu, Kristian Demaj, Edmond Budina etj., por munguan figurat politike.
Për më shumë detaje nga manifestimi lexoni artikujt e mëposhtëm:
Në fund ai që ka mbajtur fjalën e tij para të pranishmëve ishte vetë Meta, i cili sikurse pritej hodhi akuza të shumta ndaj qeverisë.
Presidenti solli në vëmendje disa nga vendimet e fundit, të votuar në atë që Kreu i Shtetit e cilëson Parlament një partiak dhe tha se qeveria miratoi ligjin “Anti-KÇK”, vetëm për të asgjësuar totalisht drejtësinë e re, dhe ligjin për betimin e gjyqtarëve të Gjykatës Kushtetuese, me qëllimin e vetëm për t’i bërë kësaj gjykate kamikazët e Rilindjes.
