Kryetarja e Lëvizjes Socialiste për Integrim, Monika Kryemadhika pranuar ditën e djeshme të marrë mandatin në qarkun e Fierit, duke lënë kështu jashtë parlamentit Kejdi Mehmetajn, e cila ishte e dyta në listën e Fierit. Me këtë vendim që mori Kryemadhi i dha mundësinë të futej në Kuvend nënkryetarit të LSI-së, Petrit Vasili, i cili ishte në listën e Tiranës dhe mori vetëm 361 vota gjithsej.
E ftuar në emisionin “Breaking”, Kejdi Mehemetaj, u shpreh se këtë lajm ja ka dhënë vetë kryetarja e LSI-së, Monika Kryemadhi. Gjithashtu ajo ka shtuar se ky vendim do ta bëj atë të reflektoj dhe se angazhimi që ajo ka në LSI nuk do të zbehet, por do të shtohet.
“Lajmin e kam marrë nga vetë Kryemadhi, kam biseduar me të. Kryemadhi ka dashur vetë qysh para dy vitesh të jetë deputete e Fierit. Në LSI kemi filluar të bëjmë analiza mbi metodologjinë në procesin e reflektimit Brenda LSI. Ne nuk e kemi pare garën e brendshme të LSI e cila mund të na vërë në presion me njëri-tjetrin. Monika Kryemadhi është deputetja më e votuar në qarkun e Fierit, votuesit e LSI kanë votuar për të patur 2 deputetë në Tiranë dhe një në Fier. Unë nuk e kam pare angazhimin tim të lidhur me postet që unë mbajë. Ky rezultat më angazhon të reflektoj, nuk zbehet angazhimi në LSI, pavarësisht çdo gjëje. Gjatë fushatës mendoj se duhet të ishim më agresiv, rezultati që unë prisja nuk doli, u shpreh Mehmetaj.
