Ditën e sotme deputeti i Partisë Demokratike, Oerd Bylykbashi ka kërkuar që Gjykata Kushtetuese të heqë mandatin e kryediplomates së Shqipërisë, Olta Xhaçka. Në fjalën e tij jashtë godinës së Gjykatës Kushtetuese, Bylykbashi tha se instutucioni ka vendosur edhe më parë standarde të qarta për pushtetarët që përfitojnë nga pozita e tyre. Ndërsa shtoi se mosgjykimi i ministres së Jashtme do të shënonte një hap pas.
“Kushtetuta ka një predispozitë shumë të qartë në mbrojtje të interesit publik. Asnjë prej deputetrëve nuk mundet që të ushtrojë një aktivitet fitimprurës apo të përfitojë nga pasuria e shtetit. Pasoja është humbja e mandatit të deputetit. Kushtetuesja e ka vendosur standardin për dy deputetë që kanë pasur përfitime shumë herë më të vogla se aq duke humbur mandatin. Është i vetmi sanksion që ka Kushtetuta. Kjo është bërë në mënyrë të qëllimshme për të parandaluar që deputetët të ushtrojnë pushtetin për t’u pasuruar në dëm të publikut. Precedenti është vendosur, nëse sot do të bjerë ky precedent, do të zhbëjë pikën 3 të nenit. Të 140 bashkëshortët e deputetëve dhe ministrave do të ushtrojnë përmes kamuflimit që të hyjnë të varfër dhe të dalin të pasur. është detyra dhe nderi që të mbrohet interesi publik. Gardiani i fundit është Gjykata Kushtetuese,”-tha ndër të tjera Bylykbashi.
Deri më tani, Kushtetuesja ka shqyrtuar padinë e parë dhe ka kërkuar 30 ditë kohë për vendimin. Opozita pretendon se deputetja Xhaçka është në konflikt të hapur interesi, sepse kompania e bashkëshortit të saj, pra edhe ajo vet, kanë përfituar pasuri publike shtetërore, gjatë investimit në një objekt turistik. Ndërsa sipas socialistëve, ky rast nuk ka të bëjë me konflikt interesi, dhe propozojnë në raportin e tyre, që mocionet e opozitës të mos i përcillet Gjykatës Kushtetuese, sepse shoqëria e bashkëshortit të deputetes Xhaçka do të ndërtojë me leje në një truall privat dhe nuk ka ndonjë kontratë me institucione për të përfituar nga prona publike.
