Kryetari i degës së Lëvizjes Vetëvendosje në Shqipëri si dhe kandidati i kësaj partie për deputet në qarkun e Tiranës, ka akuzuar Partinë Socialiste se po u vjedh vota gjatë procesit të numërimit. Me anë të një postimi në rrjetet sociale, Abazi ka shkruar se votat që i janë dhënë si kandidat i pavarur po bëhen të pavlefshme. Ndër të tjera ai ka thënë se shumë prej tyre po i kalojnë edhe Partisë Socialiste. Gjithashtu ai shkruan se kanë evidentuar disa qendra votimi, për të cilat thotë se ka materiale që do ti publikoj më vonë.
“Një nga mënyrat se si po e vjedhin dhe/ose deformojnë votën tonë në këto zgjedhje është si në vijim: Aty ku qytetari ka vendosur një “X” poshtë nr. 13 në fletën e votimit pranë emrit tim, te i njëjti fletëvotim kanë vendosur edhe një “X” tjetër te një prej kandidatëve të PS, duke e shpallur të pavlefshme fletën e votimit ose duke ia dhënë PS. Deri tani këto raste i kemi evidentuar në disa Qendra Numërimi të cilat do i bëjmë publike në vijim,”- ka shkruar Abazi.
Përveç Abazit, Lëvizja Vetë Vendosja kandidon me dy emra të tjerë; Kreshnik Merxhani në Gjirokastër dhe me Iliaz Shehun në Lezhë.
