Ditën e sotme ka pasur një sulmi ushtarak midis Armenisë dhe Azerbajxhanit, ndërkohë që ka ardhur një reagim nga presidenti i Francës, Macron.
Zyra e presidentit Emmanuel Macron deklaroi se Franca pritet të diskutojë çështjen midis Armenisë dhe Azerbajxhanit në Këshillin e Sigurimit të OKB-së, duke shtuar se presidenti francez vazhdoi t’u bëjë thirrje të dyja palëve që të respektojnë armëpushimin.
Vlen të theksojmë se Armenia njoftoi sot se të paktën 49 ushtarë të saj u vranë në luftimet përgjatë kufirit me Azerbajxhanin pas një përshkallëzimi të armiqësive që detyruan Rusinë dhe SHBA-në të bëjnë thirrje për vetëpërmbajtje.
Së bashku me SHBA-në dhe Rusinë, Franca kryeson Grupin Minsk të OSBE-së, i cili ka shërbyer si ndërmjetës midis Armenisë dhe Azerbajxhanit. Rikujtojmë se gjatë ditës së sotme, Macron bisedoi me kryeministrin armen Nikol Pashinyan dhe bëri thirrje për një armëpushim të menjëhershëm në kufirin Armeni-Azerbajxhan, fillimin e bisedimeve për zgjidhjen e mosmarrëveshjeve dhe respektimin e integritetit territorial të Armenisë.
Sipas një deklarate nga presidenca franceze, Macron u deklarua në dispozicion për të biseduar me presidentin e Azerbajxhanit, Ilham Aliyev. Konflikti i stërzgjatur i trashëguar nga fundi i Bashkimit Sovjetik është rindezur sërish. Armenia dhe Azerbajxhani kanë luftuar për vite me radhë për Nagorno-Karabakun, brezin e vogël toke të rrethuar pothuajse tërësisht nga Azerbajxhani, por me një shumicë armene.
