Zëvendëskryetari i LSI, Luan Rama është rikthyer në Vlorë pasi nuk arriti të siguronte mandatin e deputetit në këtë qark. Rama shkruan në një postim në Facebook se puna që është bërë përballë makinerisë kriminale të pushtetit, nuk u shpërblye me rezultat. Megjithatë ai falenderon të gjithë koordinatorët e LSI-së dhe shtabeve elektorale për pasionin dhe përkushtimin. Rama garanton se nuk do të ndalojë së foluri për problemet e qytetarëve për të përligjur mbështetjen dhe respektin që i kanë dhënë.
Postimi i plotë:
Përsëri në Vlorë:
MIRËNJOHJE PËR ANGAZHIMIN DHE PUNËN ME PËRKUSHTIM
Përsëri në Vlorë, për të falenderuar me gjithë zemër dhe për t’ju shprehur mirënjohjen dhe respektin të gjithë koordinatorëve të LSI-së dhe shtabeve elektorale të saj që punuan me shumë pasion dhe përkushtim.
Pavarësisht rezultatit që nuk shpërbleu punën e bërë përballë makinerisë kriminale të pushtetit, ekipet e LSI-së të mbushura me djem dhe vajza të mrekullueshëm, ia dolën të fitojnë respektin dhe mirënjohjen e qytetarëve, çka është një motiv më shumë për të qenë të bashkuar dhe për t’u bërë zëdhënës dhe mbrojtës të interesit qytetar.
I detyruar përulësisht ndaj të gjithë veprimtarëve të LSI-së dhe qytetarëve të Vlorës, Sarandës, Himarës, Selenicës, Delvinës, Finiqit dhe Ksamilit, unë nuk do të resht së foluri për problemet e tyre, për të përligjur respektin dhe mbështetjen e me zemër që më dhanë.
