Lëvizja Socialiste për Integrim ka ankimuar në Kolegjin Zgjedhor vendimin e Komisionit të Ankesave dhe Sanksioneve për Qarkun e Beratit. Ankimimi është depozituar ditën e sotme, ndërsa LSI nuk bie dakord me KAS që miratoi rezultatin zgjedhor të 25 prillit. KAS vendosi fillimisht të rinumëronte 114 kuti në qarkun e Beratit, por LSI sërish nuk arriti të siguronte mandatin e deputetit, por vetëm ngushtoi diferencën në vota me PS. Fillimisht diferenca mes LSI dhe PS ishte 73 vota, ndërsa pas rinumërimit shkoi në 55 vota.
Në procesin e hapjes së kutive u hasën disa parregullsi të ndryshme. Partia Demokratike kishte publikuar më parë një dokument ku shihej se nga kryqëzimi i të dhënave të Pajisjeve të Identifikimit Elektronik, 19 persona kishin votuar 53 herë.
Lëvizja Socialiste për Integrim ka thënë vazhdimisht se zgjedhjet në qarkun e Beratit janë të vjedhura dhe për këtë arsye duhen shpallur të pavlefshme dhe të ripërsëriten. LSI kishte deklaruar më herët se do i shkonte deri në fund betejës për Beratin, pasi sipas tyre provat dhe faktet ishin evidente. Ata gjithashtu e cilësuan vendimmarrjen e KAS politike dhe thanë se nuk u shqyrtuan me profesionalizëm prova që LSI kishte paraqitur, akte zyrtare, procersverbale të QV, të Grupeve te Numërimit, të ZAZ.
