Në një takim me drejtues të Policisë së Shtetit, ministri i Brendshëm Sandër Lleshaj është përqendruar tek lojërat e fatit, ku ka dhënë edhe porositë e tij të fundit.
Lleshaj tha se çdo pikë bastesh që do të operojë pas përfundimit të afatit do të trajtohet si një parcelë me kanabis.
“Që në orën 00:00 të 1 janarit të 2019-ës nuk do të lejohen bastet sportive, lojërat me kalë, apo dhe reklamat për bastet, pasi janë veprimtari të paligjshme. Policia e Shtetit në këtë rast është strukturë në zbatimin e drejtpërdrejt të ligjit. Ndalimi i lojërave të fatit është përgjegjësi e madhe ligjore. Zbatimi i ligjit është një goditje kriminale. Çdo pikë bastesh do të trajtohet si parcelë kanabisi. Përgjegjësi ligjore është ndalimi i lojërave të fati.”- tha Lleshaj.
Mes të tjerash Lleshaj u ndal edhe tek festat e fundvitit, ndërsa shtoi se një vëmendje e veçantë do të shkojë tek pikat kufitare, ku do të shtohen prania e policisë.
“Duhet të shtohen kontrollet dhe bashkëpunimet me qytetarët. Meqenëse jemi mbledhur këtu, dua të sqaroj edhe disa probleme që kanë rëndësi. Siç është menaxhimi i festave që janë në prag. Ndaj kërkohet që të shtohen shërbimet e policisë në pikat kufitare. Vëmendja e shtuar duhet të shtohet ndaj personave në kërkim, apo atyre që janë me precedentë kriminale.”-pohoi ministri.
