Ambasadorja e Shteteve të Bashkuara të Amerikës, Yuri Kim ka shkuar sot në qytetin e Elbasanit për të zhvilluar disa takime me drejtuesit politik të PS-së dhe PD-së.
Mësohet se diplomatja amerikane ka zhvilluar takime veçmas me Taulant Ballën dhe Gazment Bardhin. Gjithashtu ka zhvilluar dhe takim me kryetaren e LSI, Monika Kryemadhin.
Kjo vizitë e Kim në Elbasan vjen fill pas zyrtarizimit të listave të kandidatëve për deputetë.
Por, gjithashtu në një qark, ku gara e 25 prillit pritet të jetë e fortë dhe ku në të shkuarën nuk kanë munguar tensionet.
Ambasadorja amerikane herë pas herë ka bërë thirrje që në listat e kandidatëve për zgjedhjet e 25 prillit të mos ketë persona të inkriminuar.
Yuri Kim lajmëroi të dielën, se përgjegjësit kryesor do të jenë udhëheqësit e partive politike për listat e kandidatëve që do të paraqesin në Komisionin Qendror të Zgjedhjeve.
“Listat e depozituara nga partitë do na tregojnë nëse udhëheqësit shqiptarë e kanë kuptuar mesazhin nga SHBA-të, nëse janë të përkushtuar për t’u integruar në BE dhe nëse janë të gatshëm të marrin përsipër vendimet e nevojshme për një të ardhme më të begatë e më demokratike për Shqipërinë. Presim nga udhëheqësit e partive të tregojnë lidership të vërtetë,” – u shpreh Kim.
Nga ana tjetër, KQZ ka nisur punën për verifikimin e kandidatëve që ndodhen në listat e partive politike. Kujtojmë se sot KQZ ktheu mbrapstht listat e katër prative të vogla, ajo e Jozefina Topallit, Myslym Murrizit, Edmond Stojkut dhe Arian Galdinit.
